因為Auditor的瘋狂OT, 令我有更多機會接觸兩種夜間工作的朋友。今次先說第一種: 的士司機。我還未遇過夜間女的士司機, 讓我先統稱他們為「的士叔叔」。
(如果Client不是特別窮) 我們在夜深下班後都會Call 的士, 通常有3種Call 的士的途徑: 打電話、用App call、出街伸手截。基於安全和方便, 通常我會打電話或者用App call。
甫上車, 有不少司機叔叔都會說:
「嘩, 你都好夜放喎。聽日可以夜啲返工嗎?」
「呢個時候收工, 你係咪都係做會計或者核數呀？」
如果我不是太累, 通常都會禮貌回應:
「係呀, 做審計呀, 呢排趕緊上市公司公佈業績, 係夜啲放。」
「我唔算最夜啦, 公司仲有人努力緊。」
司機叔叔有很多Auditor常客......
「你地捱三年, 考完牌就可以揀一份舒服啲既工啦。」
「年輕人都唔會怕辛苦既, 你地仲後生嘛。」
我以為行外人對於審計的認識, 只限於在大台經常出現的 黃紅得 和 羅兵兵, 但原來有些司機叔叔對Auditor的熟悉程度尤如行家。
「下星期係咪放考試成績呀?」
「你地最快做5年就可以做Manager, 捱下啦, 好快到。」
「嗰4間Big 4, 夜晚3、4點好多人Call的士架。」(連4間Big 4名都數得出)
通常來到這些話題, 我都會問一句:
「其實係咪做審計既先會做到咁夜?」
「係架, 通常都係。」
我......再一次得到相同的答案。
或者是因為Auditor OT的人太集中於某幾個地點, 總是給人OT常客的印象。
一年遇上數十位的士司機, 他們大部分都沒有說什麼「捱得咁辛苦為咩姐」, 或者「你地一定搵唔少啦」, 而是送上一個個的鼓勵。
「做還做, 記得保重身體。」
「繼續努力呀妹。」
「阿妹, 你要俾心機, 咬緊牙關。份工係就係工時長啲, 但第時你就會發覺宜家嘅辛苦係值得。」
最有趣是有人提醒我:
「唔好做咁耐啦, 你將來都要有自己嘅生活同家庭, 唔好做老姑婆呀。」
現在很難找到一個明白這份工作的人, 最洩氣的說話往往出自同事口中。想不到能把這一切都看透的是的士司機。多謝。
=========================
【你眼中的審計員】
<你眼中的審計員 - Client篇> https://goo.gl/Sz1Ghc
<你眼中的審計員 - 朋友篇> https://goo.gl/4aqqoa
<的士怪叔叔> https://goo.gl/bdJ8I4
No comments:
Post a Comment